Kaleko jantzitako poliziek tren batean atzeman zuten urriaren 6an Hassanna Aalia ekintzaile sahararra. Jaitsiarazi, eta kanporatzeko agindu bat emanda utzi zuten aske, Burgosen. 48 orduko epea eman zioten Espainiako Estatutik joateko. Marokoko auzitegi militar batek betiko espetxe zigorra emana dio Aaliari, eta Euskal Herrian babes hartu zuen. Asiloa ukatu zioten, eta Auzitegi Nazionalean helegitea jarria du.
Eusko Legebiltzarrean jaso zuten joan den astean talde politiko guztiek. Legebiltzarkideek Aaliaren asiloa exijitu zioten Espainiako Gobernuari. Epaileak kasua ebatzi baino lehen ezin dutela kanporatu gogorarazi zioten.
