Segiko kide izatea leporatuta Espainiako Auzitegi Nazionalean epaitzen ari diren 28 gazteei babesa adierazi nahian, "beste pauso bat" eman nahi du Gasteizko Harresiak. Hala, abenduaren 20an antolatuko duten protestan parte hartzera deitu dituzte herritarrak, Gasteizko Eskoriatza-Eskibel jauregiaren parean egindako prentsaurrekoan.
Epaitzen ari diren gazteen egoeraren bilakaera azaldu dute agerraldian, "atxilotu, haietako asko inkomunikazio aldian torturatu eta gehienak espetxeratu" zituztela gogorarazteko. Aldi berean, fiskalak haietako bakoitzarentzat sei urteko kartzela zigorra eskatu duela azpimarratu dute. Gainera, datozen hilabeteetan Espainiako Auzitegi Nazionalean zein Euskal Herriko epaitegietan "epaiketa asko" egingo direla salatu dute.
Egoera horren aurrean, "herritarren konpromisoak batu" nahi ditu Gasteizko Harresiak, "epaiketa politikoak behin betiko gelditzeko". Protestara deitu dituzte herritarrak, eta "hainbat erantzun modu" izango direla adierazi dute, betiere, epaiketak amaitu eta "giza eskubide guztien aitortza bermatuko duen garai berri bati ekiteko" helburuz. Horretarako "modu bat" izango da abenduaren 20ko mobilizazioa. Herritarron Martxa izena jarri diote, eta Konpromisoak batuz, epaiketak gelditu! lelopean egingo dute. 18:30ean abiatuko da martxa, Gasteizko Artiumetik.
