Ezker abertzaleak, berriz, irakurketa baikorragoa egin du, eta «ontzat» jo ditu ETAk emandako pausoak. Aralarrek eta Eusko Alkartasunak ere baloratu egin dute elkarrizketa.
EZKER ABERTZALEA
«ETAk harturiko konpromisoak ateak zabaltzen dizkio gatazkaren konponbideari»
ETAk gatazka politikoa konpontzeko konpromisoak hartu ditu, ezker abertzalearen iritziz. Prozesua ez baldintzatzeko harturiko erabakia nabarmendu dute. Horrenbestez, «soilik alderdi politikoak izango dira eztabaidaren protagonistak». Gatazkaren konponbiderako prozesuak «alternatibarik ez» duela gaineratu dute, eta prozesua «bururaino» eramateko bere esku dagoen guztia egingo dutela. Nazioarteko komunitatearen inplikazioa txalotu, eta gobernuen «borondatea» eskatu dute.
«ETAk ez du egin hauteskunde kanpainari begirako hausnarketa, gatazkaren konponbidea bururaino eramateko zer konpromiso hartzeko prest dagoen azaltzea du xede», ezker abertzalearen aburuz.
IÑIGO URKULLU
EAJren EBBko burua
«Historia faltsutu du; aberrazio etiko handia da»
Iñigo Urkullu EAJren EBBko buruaren iritzian, ETAk «historia faltsutu» du. «Aberrazio demokratikoa, politikoa eta etikoa» iruditu zaio erakunde armatua hauteskunde kanpainan agertzea: «Duela lau urte kanpainan presente egon zen hildako batekin, eta orain ere kanpainan egon nahi izan du kaputxa zuriarekin izan arren».
JESUS EGIGUREN
PSE-EEko presidentea
«Lasaitasuna behar da, eta gauzak ondo pentsatzea»
Jesus Egigurenen irudiko, «lasaitasuna behar da» orain, «gauzak ondo pentsatu behar dira, eta egiaztatutako oinarrien gainean jokatu». ETAren elkarrizketa «haren jendearentzat» dela ulertzen du PSE-EEren lehendakariak, eta «eragindako minagatik barkamena» eskatzea galdegin dio erakunde armatuari. Orain ez da presaka aritu behar, haren irudiko: «50 urteren ondoren ezin da eskatu mirari handirik egiteko, eta, are gutxiago, orain gauden bezala kanpainan egonda». Haren iritzian «arinegi» ari dira zenbait.
ARALAR
«Urratsak egiten jarraitu behar dugu»
Aralarrek baikor hartu du ETAren elkarrizketa, haren ustez «baieztatu» egiten baita ETAk «alde bakarrean hartutako erabakia». Urratsak egiten jarraitu behar dela azpimarratu du, «betiere bakegintza eta politika nahastu gabe». Gatazkaren ondorioei konponbideak eman behar zaizkiela uste du alderdi abertzaleak: «Presoei, biktimei eta adiskidetzeari heldu behar zaie».
JUANJO AGIRREZABALA
EA
«Errealitatetik gertuagodago ETA»
Elkarrizketa politikoetan ez duela parte hartuko esanda, «errealitatetik gertuago dagoela erakutsi du» ETAk, Juanjo Agirrezabalaren irudiko. Baikorra iruditzen zaio ETAk hori onartzea.
UXUE BARKOS
Geroa Bai
«Hauteskundeak pasatu arte ez dut baloraziorik egingo»
Geroa Baiko hautagai Uxue Barkosek salatu egin du ETA kanpainan «oldarka sartu izana». Horregatik, esan du azaroaren 20ko bozak pasatu arte ez duela baloraziorik egingo. Uste du kanpaina honetan erantzunik ez zaiela emango ETAren eskariei.
RODOLFO ARES
Eusko Jaurlaritzako Herrizaingo sailburua
«ETAren helburu bakarra hauteskunde kanpaina barruan egotea da»
Rodolfo Aresek ez du askorik sakondu nahi izan ETAren elkarrizketan. Hauteskunde kanpainan agertzeko «asmoa» daukala adierazi du, eta ez duela helburu hori «hedatzeko» asmorik. Gainontzeko alderdi politiko eta erakundeei jarrera bera erakusteko eskatu die, «protagonistak alderdiak» direlako.
JOSE BLANCO
Espainiako Gobernuko bozeramailea
«Ez dugu inoiz ETAk 'Gara'-n egindako elkarrizketarik iruzkindu, eta ez dugu egingo»
Jose Blancok, Espainiako Gobernuko bozeramaile gisa, ez du baloraziorik egin. «[Espainiako] Gobernuak ez ditu inoiz iruzkindu ETAk Gara-n egindako elkarrizketak. Ez dugu egin, eta ez dugu egingo». «Indarkeriarik» gabeko lehen bozak direla esan du.
ALFREDO PEREZ RUBALCABA
PSOEren presidentegaia
«Indarkeriarik gabekolehen kanpaina izatea bakarrik da garrantzitsua»
Esaldi bakarrean laburu du Alfredo Perez Rubalcabak ETAren elkarrizketa: «Indarkeriarik gabeko lehen boz kanpaina izatea bakarrik da garrantzitsua».
MARIANO RAXOI
PPren presidentegaia
«Axola duen bakarra ETA behin betiko deuseztatzea da»
Labur mintzatu da Mariano Raxoi ere. ETAri «kanpainarik ez» egiteko asmoa azaldu du, eta «axola duen bakarra ETA behin betiko deuseztatzea» dela adierazi du.
