16 urteko mutil bat erreskatatu dute gaur goizaldean Zornotzako Beotibar Recycling enpresan (Bizkaia); papera eta kartoia birziklatzeko ontzi batean aurkitu dute. Suhiltzaileek atera dute bertatik, eta Galdakaoko ospitalera eraman dute jarraian. Gorputzean kolpe batzuk dituen arren, ez dago larri. Enpresak uste du kaleko edukiontzi batean babestu zela, eta zaborra biltzeko kamioiak jaso zuela ondoren.
Iñigo Jalon enpresako gerenteak berri agentziei azaldu dienez, zauri arinak baino ez ditu gazteak: "Mirari bat izan da. Heriotza bat izan zitekeen".
