Euskal Elkartasun Feministak deituta, elkarretaratzeak egin dituzte gaur Bilbon, Donostian eta Iruñean, talibanen agintepean Afganistango emakumeen eskubideak murriztu egingo direla salatzeko.
Bilbon, hainbat lagun Espainiako Gobernuaren ordezkaritzaren aurrean bildu dira, deialdiari erantzunez. Hainbat gazte afganiar ere baziren, Afganistango bandera astinduz. Leloak oihukatu dituzte: esaterako, «feminismoa nazioartekoa da», «emakume afganiarrak gure ahizpak dira», edo, besteak beste, «bat ukitzen badute, denok ukitzen gaituzte».
Euskal Elkartasun #Feminista@EEFeminista moviliza a cientos de personas en #Bilbao#Donostia e #Iruña para denunciar la invasión talibán en #Afganistan 🇦🇫 y la vulneración de #DDHH de la población, especialmente de niñas y mujeres 🚨 #EmergenciaFeministapic.twitter.com/fvIA58BWy4
— Ecuador Etxea (@EcuadorEtxea) August 20, 2021
Elkarretaratzearen amaieran manifestu bat irakurri dute, eta nabarmendu protesten helburua zera dela, giza eskubideei dagokienez afganiarrek pairatuko duten atzerakada salatzea; «bereziki, neskek eta emakumezkoek». Euskal Elkartasun Feministak Espainiako Gobernuari eskatu dio azkartu ditzala iheslari afganiarrei asiloa emateko prozedurak eta estu har ditzala nazioarteko agintariak talibanen jazarpenaren aurkako neurriak har ditzaten.
Bide batez, EB Europako Batasunaren jarrera ere kritikatu dute manifestuan, «ez delako neurri eraginkorrak hartzen ari muturreko erlijiosoen jokabidea gelditzeko».
