Jose Antonio Agirre Eusko Jaurlaritzako aurreneko lehendakariaren mezu "humanista" goraipatu du Iñigo Urkullu Eusko Jaurlaritzako egungo lehendakariak: "Jarraipena eman behar diogu Euskadi mundura zabaltzeko bere mezuari. Demokrazia eta askatasuna nahi zuen herrialde baten enbaxadore izan zen". Agirre zenaren ondarearekin "engaiatuta jarraitzen dugu gaur egun", erantsi du Urkulluk.
Soilik legebiltzarkideek jaso ohi dute Eusko Legebiltzarraren bereizgarria, baina lehendakari zenaren alaba Aintzane Agirreri eman dio gaur intsignia Bakartxo Tejeria Eusko Legebiltzarreko presidenteak. Tejeriak azaldu duenez, sinbolikoki aitortzen diote horrela legebiltzarkide izaera Agirreri, hura Jaurlaritzako lehendakari izendatu zutenean ezin izan zutelako legebiltzarrik osatu —1936ko gerraren eraginez—.
1936ko urriaren 7an sortu zen Jaurlaritza, Agirre bera lehendakari zuela. Gernikan (Bizkaia) egin zuen zin. Francisco Franco generalaren aldekoek gerra irabazita, Jaurlaritza herbestean izan zen; 1960an hil zen Agirre Parisen, eta Jesus Maria Leizaolak ordezkatu zuen karguan.
"Herbestea ezagutu zuen garai bereziki larrietan, baina hala ere askatasunaren eta demokraziaren alde egin zuen lan", esan du Tejeriak.
