Agerraldi bateratua egin dute Xabier Olano eta Juantxo Iturria EH Bilduko eta Ahal Dugu-ko Gipuzkoako Batzar Nagusietako eledunek. Argudiatu dutenez, aldundiak uko egin dio Bidegiren auziari buruzko "inolako informaziorik" emateari, eta horren aurkako protesta gisa erabaki dute ez joatea.
Bidegi auziko kereilan "oker" egindako neurketak daudela esan zuen joan den astean Gipuzkoako Aldundiak, eta gaur da Aintzane Oiarbide Gipuzkoako Bide Azpiegitura diputatua Batzar Nagusietara joatekoa, horren inguruko azalpenak emateko. Agerraldi hori "propaganda eta autolaudorioa" delakoan, ez joatea erabaki dute bi taldeek, informazio hori helarazten ez zaien artean. Gainera, salatu dute diputazioa ikerketa batzorde bat eratzearen aurka azaldu dela.
