AHTaren Gipuzkoako bi tartetako lanak eskaintzen hasi da Jaurlaritza

Eusko Jaurlaritzak onartu du AHT abiadura handiko trenaren Gipuzkoako bi eremutako lanak eskaintzeko prozedurari ekitea. Ezkio-Itsasoren ekialdetik Antzuolara doan tartea eta Bergarako zatietako lanak eskainiko ditu Jaurlaritzak; 233 milioi euroko aurrekontua zehaztu du horretarako.

Antzuola eta Ezkio-Itsaso arteko tarteak 133 milioi euroko aurrekontua du, eta 63 hilabetean eraikitzekoa dela zehaztu du Jaurlaritzak. 3,5 kilometroko luzera du ibilbideak, eta tunel barrutik doa gehiena. Ezkio-Itsason trenarentzat geltokia egin asmo duten puntuarekin lotuko dute ibilbidearen zati hori.

Bergarako tarteak, bestalde, 3,2 kilometroko luzera du. Obra hori ere 63 hilabetean egin beharrekoa dela zehaztu du Jaurlaritzak, eta ehun milioi euroko aurrekontua duela. Bergarako AHTaren zati hori Deba ibaiaren eta AP-1 autobidearen gainetik igarotzekoa da. Horretarako, zubibide bat eraiki beharko dute, 900 metroko luzerakoa, eta punturik garaienean, 90 metroko altuera izango du.