Eusko Jaurlaritzak, aurten, 830 milioi euro jarriko ditu AHT abiadura handiko trena egiteko. "Zulo" horretan diru gehiago ez sartzeko eskatu du, gaur arratsean, Mila Elortza AHT Gelditu! Elkarlaneko kideak, tren lasterraren lanak gelditzeko Hernanin egin duten giza katearen bukaeran.
Elorrabi baserritik abiatu da martxa, 17:30 aldera, eta Karabel auzoraino joan dira manifestariak, elkarri helduta. Urumea ertzetik joan dira, AHTaren obrak egiten ari diren tokiak ikusiz. "Urumea ertz honetan ikusten da egiten ari diren txikizioa", nabarmendu du Mikel Alvarez AHT Gelditu! Elkarlaneko kideak: "Oso kalte handiak egiten ari dira Urumean".
Baserri, landa eta nekazari lurrak dira Hernanin AHTaren obrek ukitu dituztenak. Urtearekin hasi ziren lurrak markatzen, eta martxotik abiada handia hartu dute lanek. "Gure lurretik bizitzeko aukera desagertzen ari da", salatu du Elortzak.
Goizean Urumea ibaiaren jaitsiera egin dutenekin elkartu dira manifestariak Karabelen, eta kalejiran igo dira Hernanira.
