Eusko Jaurlaritzaren menpe dagoen ETS Euskal Trenbide Sareak kudeatzen du Euskal Y-aren Gipuzkoako zatia, eta, Efe agentziak ETSko iturriak aipatuz zabaldu duenez, ez dute lanei berrekiteko datarik zehaztu.
Hiru arrazoik eragin dute etetea, iturri horren arabera: lursail batzuk desjabetzean arazoak izan dituzte, Espainiako Kosta Zuzendaritzak eman beharreko baimen batzuk falta dira eta proiektuan eginiko aldaketa batzuk Adifek onartzea falta da. "Behin-behinekotzat" jo dute lanen etetea, argitu arte "zergatik heldu den aurrera egin ezineko momentu batera". Halaber, zehaztu dute desjabetzeekin izandako arazoak partikularrekin izan dituztela, ez Donostiako, Hernaniko eta Astigarragako udalekin.
Kosta Zuzendaritzari eskatutako baimenei dagokienez, ETSko iturriek adierazi dute Hernani-Astigarraga zatiko proiektuak Urumea ibaia hiru aldiz zeharkatzen duen zubi bat aurreikusten duela, eta, beraz, baimen horiek derrigorrezkoak direla.
Egitasmoan eginiko aldaketak onartu behar ditu Adifek, gainera. Astigarragan AHTa heltzeko geltoki bat egitea zegoen aurreikusita, baina aukera hori bertan behera geratu zen ondoren. 2.475 metro luze da Hernani-Astigarraga zatia.
