Testu horretan, hautetsiek haien prestasuna adierazi zuten elkarrizketa politikoari ekiteko. Ipar Euskal Herrian urrats hori posible bada, Euskal Herri osoan, goiz ala berandu, urrats hori egin beharko dela, posiblea dela, ondorioztatu dute antolatzaileek.
Antolatzaileek eskerrak eman dizkiote gizarteari eta Aieteko adierazpenean sinetsi duten guztiei, baita Foroa antolatzen lagundu duten militante anonimoei. Horien artean Aurore Martin aipatu dute. Baionako Foroa ez da deusen bukaera izan, ondoko urratsen abiapuntu baizik.
Datorren urtean lau mintegi antolatuko dituzte eta oraindik datarik ez bada finkatu, lehenean gatazkaren ondorioak aipatuko dira, alegia, presoen gaia, iheslariak, desarmea... Nazioarteko Harremanetarako Taldeko partaideek erran bezala, "gakoa gizartearen esku" dagoela nabarmendu dute antolatzaileek. Aieteko adierazpena eta Baionako Foroko bilduma gizarteratzea izanen dute eginkizun ondoko asteotan.
