Akordio politiko berri baterako gutxienez Gernikako Estatutuaren pareko babesa behar dela dio Imazek

Josu Jon Imazen hitzetan balizko konponbidearen gakoak bi oinarri nagusi ditu: "ez inposatu" eta "ez eragotzi". Izan ere, Imazen ustez, beharrezkoa da era berean euskal alderdiek lortutako "akordio politikoak egungo esparru juridiko-politikoan txertartzeko bidea ematea, Estatuko erakundeek lortutako akordio baten bidez".

ETAren su-etenaren bilakaera izan dute hizpide, besteak beste, bi ordu eta laurden iraun dituen bileran. Kazetarien aurrean bilera amaituta egin duen agerraldian EAJren EBBko presidenteak azaldu duenez "agertoki honetan aurrera egiteko esparru bat eta jokoa daude". Imazen hitzetan, "gakoa akordio politikoa da"eta horretarako beharrezkoa da "Euskadiko alderdi politiko guztiek elkarrizketaren egutegiak, metodologia eta prozedura ezartzeko bidean aurrera egitea". Azpimarratu du, beti ere, bakean eta askatasuna nagusi diren agertoki batean.

Etorkizuneko elkarrizketa horietan PPk ere parte hartzea espero du Imazek. Azpimarratu du EAJk ahalegin guztiak egingo ditueala alderdien mahai horretan sentsibilitate guztiak ordezkatuta egon daitezen.