Akordio tranbertsala behar dela nabarmendu du PSE-EEk

Patxi Lopez PSE-EEko idazkari nagusiaren iduriko, euskal gizartearen lehentasuna ez da Espainiarekin hitzarmen berri bat egitea, baizik eta " behin ETA desagertuta adostasun politikoa zabalduko duen euskal herritarren arteko akordioa lortzea". Hori dela eta, Juan Jose Ibarretxe Jaurlaritzako lehendakaria oker dabilela irizi dio, Espainiarekin akordio berriak proposatzen dituelako, eta "eztabaida identitarioak" bultzatzen dituelako. "Desberdin pentsatzen dutenen artean elkar ulertzea eta akordio transbertsalak bilatuko dituen lehendakaria nahi du euskal gizarteak".

Ildo horretatik, PSE-EEren "errepide mapa" zein den argitu du Lopezek: EAEn akordio "zabal eta transbertsala" lortzea indarkeriarik gabeko" egoeran; akordio hori Espainiako Legebiltzarrak onartzea, eta, ondoren, herritarrei galdetzea. "Erreferendum hori da euskal herritarrek espero eta merezi duten galdeketa, batzuek besteen kontra barik denon arteko Euskadi bat egiten utziko diguten akordioak legearen eta zilegitasunaren barruan berresteko".