Datorren astelehenean, hilaren 8an izango da Hondarribiko (Gipuzkoa) alardearen eguna. Bitan banatuta aterako dira konpainiak aurten ere: batetik, emakumeak soldadu gisa onartzen ez dituztenak, eta bestetik, Jaizkibel konpainia, andreak eta gizonak elkarren alboan hartzen dituena.
Ertzaintzak ebazpena kaleratu du egunaren antolaketari buruz. Aurreko urteetako berberak izango dira ordutegiak eta ibilbideak —goizean, 08:25ean abiatuko da alarde parekidea, eta arratsaldean, 17:10ean—.
Eskari bana egin die Ertzaintzak bi alardeei, iaz bezala. Batetik, Jaizkibel konpainiari eskatu dio desfile itxura emateko bere ibilbideari —manifestazio baimenarekin egiten dute bidea—: alardean soldadu jantzita doazenekin batera kaleko arropaz jantzitako jenderik ez sartzeko eskatu du. Dei horri jarraituko dio Jaizkibelek, eta, iaz bezala, aurten ere ez du manifestazio hasieretako kartelik eramango.
Beste eskaria Alarde Fundazioari egin dio Poliziak —hark sustatzen du soldadu gisa gizonak soilik onartzen dituen desfilea—: alarde parekidearen ibilbidean ez dezala publikoak plastiko beltzik agertu. Berritasuna badago puntu horretan: izan ere, Ertzaintzak ebazpenean dioenez, alarde parekidearen kontra plastikoak eta bestelakoak agertzen dituzten herritarrak alarde baztertzeailearen "zaleak" dira, eta horregatik eskatu dio fundazioari horrelako jarrerak saihesteko.
Iaz ere eskari bera egin zuen Ertzaintzak, baina Jaizkibel konpainiaren kontrako plastikoak agertu zituzten herritar batzuek. Ertzaintzak ohartarazi du plastikoarekin kalea ixteak zaildu egiten duela Jaizkibelen desfilea ikusi ahal izatea, eta segurtasuna arriskuan jar dezakeela. Horregatik eskatu du halakorik ez egiteko, "alardeko parte hartzaileen eskubideak eta segurtasuna hobeto bermatzeko".
