Bizkaiko Batzar Nagusiek onartu duten testuak Espainiako Kongresuari eskatzen dio "berehala indargabe dezala" Alderdien Legea, eta esaten du, urrats hori ezinbestekoa dela "euskal herritarren eskubide demokratikoak" berreskuratzeko.
EB-IUko Jose Ferrerasek aurkeztu du ekimena, eta esan du milaka euskal herritarrei eskubideak murriztu zaizkiela, zehazki, eurek nahi duten proiektu politikoari boza ematekoa. "Jose Maria Aznarren Gobernuaren garaian saiatu ziren talde terrorista bat Euskal Herri osoarekin identifikatzen, eta manipulatu egin zen ETA proiektu politiko jakin batekin identifikatzeko", azpimarratu du.
EAJk eta EAk bat egin dute ekimenarekin. PPk eta PSE-EEk, ordea, kontra bozkatu dute eta Alderdiaren Legeak "terrorismoaren kontrako borrokari egindako mesedea" nabarmendu dute.
Alderdien Legea gaitzesteaz gain, "terrorismo guztien biktimei" elkartasuna adierazten die Bizkaiko Batzar Nagusiek onartutako testuak, batik bat, Martxoaren 11ko Madrilgo sarraskiko biktimei.
Batasunaren ilegalizazioa
Alderdien Legea "berehala indargabetzeko" eskatu dute Bizkaiko Batzar Nagusiek
EB-IUren ekimenez, Espainiako Alderdien Legea "berehala indargabetzeko" eskatzen duen ez arauzko proposamena onartu dute Bizkaiko Batzar Nagusiek. EAJk eta EAk ekimenaren alde bozkatu dute, eta PPk zein PSE-EEk, berriz, aurka. Batasuna Alderdien Legearen bidez ilegalizatu zuten, eta onartutako testuan esaten da milaka euskal herritarrei nahi duten alderdiari boza emateko eskubidea debekatu zaiela. Halaber, "terrorismoaren biktima guztiei" elkartasuna adierazi diete, batik bat, Martxoaren 11koei.
Iruzkinak
Ez dago iruzkinik
Ordenatu
