Soto del Realen zeuden preso hirurak, baina lekuz aldatu dituzte Oihan Arnanz eta Adur Ramirez de Alda; aurrenekoa Navalcarneroko espetxera eraman dute, eta Ramirez de Alda, berriz, Aranjuezko bakartze modulu batera. Soto del Realen jarraitzen du Jokin Unamunok.
Guztira, hamar gazte daude auzipetuta Altsasuko auzian —adingabeak dira haietako bi—. Iragan astean, Espainiako Auzitegi Gorenak erabaki zuen Altsasuko auzia Madrilen epaituko dela, eta ebazpen horrekin kolpe gogorra eman zieten auzipetuei eta haien senideei.
Datorren asterako batzar ireki bat antolatuko dute Iruñean, gizarte eta kultur taldeekin auziaren inguruko gogoeta bateratua egiteko. Gazteen gurasoek ez dute nahi «bermerik gabeko egoera hori egonkortzea» eta Auzitegi Nazionalak euren seme-alabei espetxe zigor "neurrigabeak" ezartzea. Azken batean, iazko urriaren 15eko goizaldean Altsasun (Nafarroa) izandako liskar horiek terrorismo delitutzat joz gero, gazteek hamar urtetik gorako espetxe zigorrak jasateko arriskua daukate.
