Amaia Azkue hiltzea leporatzen dioten gizonezkoaren aurkako epaiketa astelehenean hasiko da, Diario Vasco egunkariak jaso duenez. 50 lagun inguru deitu dituzte deklaratzera, lekuko gisa, baita 30 peritu ere. Auzialdiak goiz eta arratsaldez izango dira.
Egunkariak aurreratzen duenez, 09:30ean hasiko da epaiketa, eta ustezko hiltzailea izango da deklaratzen lehena.
Adingabeen legeari jarraiki egingo dute epaiketa, gazteari leporatzen zaizkion ekintzak 17 urte zituenean gertatu baitziren.
Fiskaltzaren eta Amaia Azkueren familiaren akusazioek hamar urteko zigorra eskatzen dituzte, eta beste bost urte zaintzapeko askatasunean.
Amaia Azkuen martxoaren 16an agertu zen gorpu, Azpeitiko Ibai-Eder urtegian, indarkeria zantzuekin. Eguerdian Zarauzko saltoki handi bateko aparkalekuan ikusi zuten azken aldiz. Hilketa gertatu zenean lapurretaren hipotesia nagusitu zen. Ertzaintzaren frogek berretsi egin zuten adingabeak hil zuela Azkue.
