Hasi baino eguraldi nabarmen hobearekin amaitu da bart gauean San Sebastian eguna. Gauerdian jaitsi du Donostiako alkate Juan Karlos Izagirrek hiriko bandera, ospakizuna amaitutzat emanaz. Hala ere, gauerditik aurrera ere jarraitu du festak Konstituzio plazan.
Raimundo Sarriegirenak ez diren doinuak jo ohi dituzte gauerditik aurrera, Realaren ereserkia tartean. Giroa berotu zuen Realak larunbat iluntzean Bartzelonari garaituz, eta atzo mutilen taldeko hainbat jokalari izan ziren plazako udal liburutegian.
Egunean zehar, haur danborradak jarri zion kolorea festari. Euria egin zezakeela-eta ez ateratzekotan egon ziren, baina jaiari eustea erabaki zuten. Euri apur bat egin bazuen ere, festak aurrera egin zuen. Udaletxean, berriz, Urrezko Danborra eman zioten Donostiako txirrindulari Klasikoari. Egunaren jarraipena egin zuen Irutxuloko Hitzak.
Azpeitian, Tafallan eta Lakuntzan ere ospatu zuten eguna. Azpeitian, 500 haur inguruk hartu zuten bertako haur danborradan, eguraldi kaskarra izan bazuten ere.
