Ana Pastor aukeratu dute Espainiako Kongresuko presidente, bigarren bozketan Patxi Lopez PSOEko hautagaiari nagusituta. Pastor gehien bozkatua izan da lehen bozketan ere, baina, gehiengo osoa lortu ezinda, bigarrenean nagusitu da, gehiengo soilarekin.
169 diputaturen babesa jaso du Pastorrek: PPko 137ena eta Ciudadanosen 32ena. Patxi Lopezek, berriz, PSOEren eta Unidos Podemosen babesa jaso du: 155 guztira. 25 diputatuk zuri bozkatu dute. Multzo horretan daude EAJ eta EH Bildu.
Senatuan, berriz, Pio Garcia Escuderok (PP) jarraituko du presidentetzan, bertan gehiengoa baitu PPk. EAJk ordezkaritza izango du Senatuko mahaian. Maria Eugenia Iparragirre Senatuko Mahaiko hirugarren idazkari hautatu dute. Aurreko legealdian laugarren idazkari izan zen.
