Andoni Zengotitabengoa ustezko etakidea atxilotu dute Portugalen

Andoni Zengotitabengoa bilbotarra atxilotu du Portugalgo Poliziak, bart jakinarazi dutenez. Venezuelara alde egiteko hegazkin bat hartzear zela atzeman zuten 22:00etan, Lisboako Portela nazioarteko aireportuan, SEF Portugalgo Atzerritarren eta Mugen Zerbitzuaren arabera. Iturri horiek diote Zengotitabengoak bidaiatzeko agiri faltsuak zeramatzala. "Terrorismoaren" aurkako Portugalgo Polizia taldearen esku dago orain, eta 24 ordu baino lehen epailearen aitzinetik pasako dela diote berri agentziek.

ETAkoa izatea leporatzen diote Zengotitabengoari, eta 2003tik etxetik alde eginda legoke polizia iturrien arabera. Otsailean ETAko kideek erabiltzen zuten etxe bat aurkitu zuela Obidosen zabaldu zuen Portugalgo Poliziak, eta Andoni Zengotitabengoa eta Oier Gomez zirela bizilagunak. Halaber, 1.500 kilo lehergai topatu zituztela etxe horretan. Iturri horien arabera, merkataritza zentro bateko kamerek Zengotitabengoaren irudiak hartu zituzten, eta halako identifikatu ahal izan zituzten. Nolanahi ere,orduko hartan Poliziari izkin egitea lortu zuten.