Andreak enpleguan

DIAGNOSTIKOA

2011 amaierako datuak eman dituzte sindikatuek:

•Langabezia. Krisia hasi zenean gizonen langabeziak emakumeena gainditu bazuen ere, egoera berriro irauli da: Hegoaldean, %15,4 da andreen artean, eta %13, gizonen artean. EAEn, 25 urtetik beherakoen artean aldea nabarmenagoa da: emakumeen %43 daude lanik gabe, eta gizonen %29,5.

•Kontratu mota. Iaz emakume gutxiago kontratatu ziren EAEn, baina andreen %30ek hiru kontratu baino gehiago eduki zituzten (gizonen %21ek). Kontratu mugagabeak %13 jaitsi ziren andreen artean (%8,9, gizonetan); aldi baterako kontratuak, berriz, %4,7 igo (%1,2, gizonetan). Emakumeek iaz sinatutako kontratuen %47,6 lanaldi partzialekoak izan ziren.

•Soldata. Batez beste, EAEko andreek gizonek baino 6.391 euro gutxiago kobratzen dute urtero; Nafarroakoek, 7.268.

MURRIZKETEN ERAGINA

•Mendekotasun Legearen aplikazioa atzeratzea. Feministen ustez, emakumeen bizkar eroriko dira administrazioek ematen ez dituzten zaintza zerbitzuak.

•Lanbidearteko gutxieneko soldata izoztea. Lansaria zenbateko horren arabera erabakitzen duten sektoreei kalte handia egingo die. Sektoreotako gehienak feminizatuta daude; esaterako, etxeko langileak.

•Sektore publikoko lantaldeak izoztea. Eragina handiagoa da andreengan, administrazioko langileen ia %60 direlako; EAEn, aldi baterako dauden andreak lan taldearen %34 dira, eta gizonak, %16.

•Pentsioen murrizketa. Emakumeen pentsioak, berez, apalagoak dira, eta, gainera, pentsioen zenbatekoa kalkulatzeko kotizazio epea luzatzen den heinean jaisten dira, lan merkatutik ateratako aldiak hartzen dituelako zaintzan jarduteko.