EAJko kargudun ohi batzuek De Miguel Arabako ustelkeria eta espioitza auzian ardura politikoa izan zutela uste du Eusko Legebiltzarrak, gaur onartutako ebazpenean jaso dutenez. EAJk ez beste talde denek egin dute ebazpenaren alde. Alderdi jeltzaleak aurka bozkatu du.
2010eko martxoan Alfredo de Miguel EAJko kide eta Arabako Aldundiko Tokiko Administrazioetarako eta Lurralde Orekarako diputatua atxilotu egin zuen Ertzaintzak, ustelkeria egotzita. Beste zazpi lagun ere atzeman zituen. De Miguelek egun batzuetara dimisioa eman zuen. Garai hartan, Vital Kutxako presidenteorde ere bazen.
Justiziak ez ezik, Eusko Legebiltzarrak ere ikertu du kasua, auziaren lau adarrak aztertuz. Hogei bat lagun daude inputatuta.
EAJk gaurko saioan esan du legebiltzarreko txostenak "gabezia handiak" dituela, eta "epaiketa paraleloak" egin izana salatu du.
