"Erabakitzeko eskubidearen duintasun politikotik" ezin da onartu EAJk Aberri Egunean egindako proposamena, Patxi Zabaleta Aralarreko koordinatzailearen ustez. "Oinarri hori ezin da Espainiaren egituraketaren aldaketa batekin mozorrotu, ezta aldebiko akordioekin ere". Horregatik, "inongo zalantzarik gabe, ihesbiderik, disimulurik edo lotsarik gabe" erabakitzeko eskubidearen alde egiteko eskatu dio Aralarrek EAJri.
Zabaletaren ustez, sozialistek defendatzen duten eredu federalista ere ez da balekoa, horrek ere erabakitzeko eskubidea ezkutatzen baitu, haren ustez: "Bere ereduak ez badu herritarren hitza errespetatzen, ez du ezertarako balio". Horrez gain, PPk autodeterminazioa ukatzeko konstituzioarekiko errespetua erabiltzea "gezurra" dela dio Zabaletak; legeak alda daitezkeela adierazi du, eta horren adibide jarri du Espainiako trantsizioa.
