Iñigo Lamarca EAEko arartekoak Josu Uribetxeberria preso gaixoa baldintzapean aske uzteko prozedura "arintzeko" eskatu die Espetxeetako Zuzendaritzari eta Espainiako Auzitegi Nazionaleko espetxe zaintzari. Ohar bidez, Lamarcak adierazi du legeak ezarritakoaren arabera presoa baldintzapean aske uzteko baldintzak betetzen direla.
Era berean, indarkeriarik gabeko garai berriak kontuan hartuta, gaixotasun larri eta sendaezinak dituzten preso guztien egoera "lehentasunez eta berehala" baloratu behar dela adierazi du Lamarcak. Legeak zehaztutako xehetasun guztiak "zorrozki" betetzen direla aztertu.
Uribetxeberriari gose greba aurrera eramateko erabakia "berriro aztertzeko" eskatu dio arartekoak; "osasunean atzeraezinezko kalterik ez eragiteko, eta, aldi berean, Espetxeetako eta Justizia Administrazioek hartu behar dituzten erabakiek baldintza egokienak lagun izan ditzaten".
Arartekoa Uribetxeberriaren senideekin eta Etxerat eta Herrira-ko ordezkariekin bildu zen iragan astean.
Diagnostikoaren zain
Uribetxeberria medikuen diagnostikoaren zain dago, eta litekeena da ostegunean jasotzea atzo egindako frogen emaitzak. Donostiako Ospitaleko medikuek jakinarazi zuten presoa egonkor dagoela eta biopsia eta eskaner probak egin dizkiotela. Uribetxeberriak zazpigarren eguna egingo du gaur gose greban. Presoak astearte gauerdian hasi zuen baraualdia ospitaleko ziegan, jasaten ari den "muturreko egoera" salatzeko. Uribetxeberriak minbizia du, metastasiarekin.
Angel Yuste Espetxeetarako Zuzendaritzako idazkari nagusiak azaldu duenez, medikuen diagnostikoaren arabera abiatuko litzake edo ez Uribetxeberria baldintzapeko askatasunean uzteko prozedura. Behin medikuen txostena jasotzen dutenean eta bertan presoaren gaixotasun larri eta sendaezinak haren bizitza arriskuan jartzen duela frogatzen bada, espetxeko mediku batzordeari dagokio presoaren askatasuna eskatzeko idatzizko proposamena egitea. Ondoren, Espainiako Estatuko Espetxe Zuzendaritzari dagokio proposamen hori onartzea. Eta azkeneko erabakia Jose Luis Castro Espainiako Auzitegi Nazionaleko espetxe zaintzako epaileak luke.
