Arcelor Mittalen Zumarragako lantegian ere azaldu dira gai erradioaktiboak

Orain astebete Olaberriko (Gipuzkoa) lantegian gertatu bezala, erradioaktibitatea antzeman dute Arcelor Mittalek Zumarragan (Gipuzkoa) duen lantegian. Aurkitu duten gai erradiaktiboa Olaberrian aurkitu zuten bera da: Zesio-137a.

Altzairu fabrikako ke hautsa garraiatzen ari zen kamioi batean antzeman zuten erradioaktibitatea, herenegun. Protokoloari jarraituz, fusio labea geratu zuten, eta kamioei irtetea debekatu zieten. Ondoren, Eusko Jaurlaritzari eta Espainiako Segurtasun Nuklearrerako Kontseiluari (CSN) abisua eman, eta ikerketa hasi zuten. Lehen analisien arabera, Zesio-137aren fusioak eragin du erradiazioa. «Baina gertatutakoak ez du eragin erradiologikorik izan, ez langileentzat, ez biztanleentzat,ezta ingurumenarentzat ere», dio CSNk.

Duela astebete Olaberriko lantegitik Erandiokora (Bizkaia) joandako kamioi batean aurkitu zuten gai erradioaktibo bera. CSNk orduan ere adierazi zuen gertatutakoek ez zuela eraginik ez naturarentzat, eta ez pertsonentzat.

Baina Ekologistak Martxan taldeak ikerketa eskatu zuen erradioaktibitatea kontrolatzeko sistemen inguruan. Salatu zuen Araban, Bizkaian eta Gipuzkoan erradioaktibitatea neurtzeko hiru gune daudela, eta bakar batek ere ez zuela kamioiko zesioa antzeman. Gainera, gogorarazi zuen Zesio-137a kutsagarri erradioaktiboa oso arriskutsua dela, eta oso erraz lurruntzen eta zabaltzen dela.