Euskal Herriko armagabetze prozesua “berezia eta bakana” izan da, baina, nazioartean erabili ohi diren irizpideen arabera aztertuz gero, “edozein armagabetze prozesuren helburu eta printzipio nagusiak betetzen ditu”. Hala adierazi du Foro Sozial Iraunkorrak Armagabetzearen euskal eredua. Prozesu berritzaile batetik ikasitako ikasgaiak izeneko txostenean.
Izan ere, ondorioztatu dute zenbait helburu erdietsi zirela ETAren armagabetze prozesuan: “Konfiantza eraikitzea, segurtasuna areagotzea, gatazka berpizteko bide oro ixtea eta norbanakoei indarkeria erabiltzeko ahalmena murriztea”.
Foro Sozialaren iritziz, armagabetze prozesua “eraginkorra, efizientea eta segurua” izan da, “bukaeran behintzat”. Areago, “nazioarteko arauek jasotzen dituzten integraltasun irizpideak bete ditu, inork ez baitu zalantzan jarri armagabetzea erabatekoa izan denik”.
Txostenaren aurkezpenarekin, Foro Sozialak “Armagabetzeari buruzko Gogoetabidearen” jardueraren amaiera iragarri du: "Aitzitik, oraindik konpontzeke gelditzen diren gainerako ardatzen Konponbideei helduko diegu: Bizikidetza eta Memoria, Presoen gizarteratzea eta Giza eskubideak".
