Frantziako Poliziak jakinarazi duenez, gaur goizean ETAren hiru zulo aurkitu dituzte Baigorri aldean. Oraindik ez dakite zer dagoen barruan, izan ere, nahiz eta hasieran Polizia iturriek esan arma eta lehergai kopuru handia aurkitu dutela, ondoren aitortu dute zabaldu gabe dituztela eta zer egon daiteken arrastorik ez dutela.
Hala ere, horrekin batera, zuloak aspaldikoak izan daitezkeela gaineratu dute, eta agian ETAk aspaldian ez dituela erabili. Laurence le Vert epaileak zuzentzen du operazioa. Zenbait hedabideren arabera, Guardia Zibilaren laguntzarekin aurkitu ditu Frantziako Poliziak.
