«Arriskuez» ohartarazi du Pagazaurtunduak

Joseba Pagazaurtundua Andoaingo udaltzainburua ETAk atzo bederatzi urte hil zuela eta, oroimen ekitaldi bat egin zuten haren gertukoek. Hildakoaren arreba eta Terrorismoaren Biktimen Fundazioko buru Maite Pagazaurtundua izan zen ekitaldiko hizlari nagusia, eta egungo egoerak dakartzan «arriskuez» ohartarazteko baliatu zuen hitzaldia: «Kontzientzietan beldurra dago oraindik, eta herritarrei eskatzen diegu ez dezatela ETAren estrategiaren esklabo bihurtu nahi izan; aske direnek aske izaten jarrai dezatela, eta ez direnak gauzak diren bezala ikusten saia daitezela, bidean ditugun amarru semantikoetan erori gabe». Garai berria lortzeko «kaputxak kendu» eta desegiteko eskatu dio ETAri.