Irailaren 2an Arrotxapeko Gaztetxea husteko agindua dute poliziek. Hala jakinarazi dute gaztetxeko kideek sare sozialetan. Urte hasieran egindako epaiketaren epaia jaso berri dute, eta bertan zehazten da noiz.
«Gaztetxeak antolatzeko eta sistemari aurre egiteko beharrezkoak direla ulertzen dugu. Horregatik guztiagatik eta horrelako proiektuetan sinisten dugunez, hau defendatzeko deia egiten dugu», zabaldu dute gaztetxeko ordezkariek sare sozialetan.
2016ko irailean Arrotxapeko Artika kalean hutsik zen eraikin bat okupatu zuten auzoko gazteek, eta euretako hiru identifikatu zituen poliziak. Geroztik, hiru epaiketa egin dira, azkena urtarrilean, eta, gaztetxeko asanbleak salatu zuenez, gazteei «40.000 eurorainoko kostu judizialak» erreklamatzen zizkien akusazioak. Azkenean akordio bat lortu zuten, kopuru hori murrizteko.
Alta, martxotik, eraikina husteari buruzko erabakiaren zain zeuden, eta orain heldu da abisua. Gaztetxekoek beti nabarmendu dute auzoarentzat garrantzitsua dela autogestio eta kontrabotere gune bat izatea.
