Emakume batek eraso egin diotela salatu zuen, atzo, Bilbon. Erasoa Uribarriko jaietan izan zen, goizaldean, eta Udaltzaingoak bi gizon atxilotu zituen Matiko kalean, sexu askatasunaren aurkako delitua egitea egotzita.
Salaketaren arabera, ukituak egin zizkioten bi gizonek emakumeari. Udaltzaingoak atzeman ditu bi gizonak, eta Ertzaintzaren esku utzi ditu jarraian. Atxilotuak atzo arratsaldean igaro ziren epailearen aurretik, eta hark bi gizonezkoak aske uztea erabaki du. Hala ere, egunero azaldu beharko dute epaitegian. Fiskaltzak ez du eskatu atxilotuak espetxeratzeko.
Donostian, beste atxilotu bat
Gizonezko bat atxilotu du gaur arratsaldean Ertzaintzak, Donostian. Irailaren 19an —ostegunez— emakume bati sexu erasoa egitea egotzi diote. Eusko Jaurlaritzako Segurtasun Sailak jakinarazi du emakumeak gaur goizean salatu duela erasoa. Donostiako Udalak erasoa "guztiz" gaitzetsi du, eta udalbatzak elkarretaratzera deitu du bihar eguerdirako, Alderdi Ederren. Herritarrak deitu ditu erasoa salatzeko antolatuko diren mobilizazioetan parte hartzera.
