Jai giroan, datorren igandean egingo diren galdeketak babesteko ekitaldiak egin dituzte joan den asteburuan hainbat herritan. Azpeitian, esate baterako, herriko hainbat musikarik sortu eta grabatutako abestiarekin lipdub-a grabatu zuten larunbatean. Herriko hainbat talde eta norbanakok hartu zuten parte bertan. Bideoa: Azpeitiko lipdub-a (Hitzartu).
[youtube]https://youtu.be/Wxkl7b6ACSQ[/youtube]
Bergaran ere lipdub-a grabatu zuten. Kasu horretan, Gure Esku Dago-k 2014ko ekainean antolatutako giza kate handirako egindako kantuarekin osatu zuten ibilbidea, eta, han ere, herriko hainbat taldek hartu zuten parte.
[youtube]https://youtu.be/JrToeTjf_rc[/youtube]
Goierrin, berriz, mosaiko erraldoia egin zuten Larraitzen.
[youtube]https://youtu.be/oafgKMLUYuw[/youtube]
Ekainaren 5ean, 34 udalerritan egingo dituzte galdeketak: Goierri, Azpeitia, Debagoiena (Gipuzkoa) eta Aramaio (Araba), eta Ispaster (Bizkaia). 125.000 herritar daude bozkatzera deituak. "Hasiera besterik ez da", esan dute Gure Esku Dago-ko kideek. Azaroan, Dima (Bizkaia) eta Bakaiku (Nafarroa) gehituko zaizkie aurrekoei, eta datorren urtean galdeketak egiteko prozesuak martxan dira beste hainbat lekutan ere: Gipuzkoako Oiartzualdean, Usurbilen eta Hernanin, eta Bizkaiko Aulestin, Barrikan, Bermeon, Busturian, Elorrion, Sopelan, Uribe Kostan eta Arrigorriagan.
