Atarrabiak Lodosarekin partekatuko ditu Nafarroa Oinez-en irabaziak

Atarrabiako ikastolak dihardu aurten Nafarroako ikastolen festa prestatzen -30. Nafarroa Oinez-. Joan den urtean, Lakuntzari hartu zion lekukoa, eta Paz de Ziganda ikastolaren helburua da «bi urtetik hemezortzira bitarteko hezkuntza proiektua asetzea». Horretarako, iganderako, egitarau zabala antolatu dute. «Erakargarria, adin eta gustu guztietarako modukoa izanen da», azaldu du Iñaki Saenz koordinatzaileak. Guztira, sei kilometro eta bost gune izanen ditu ibilbideak: «Natura eta herri giroa uztartu nahi izan ditugu; horregatik, ibai ertzetik joanen da ibilbidea, eta Atarrabian izateaz gain, ondoko herriak ere zeharkatuko ditu; Uharte, Burlata eta Arre. Gainera, Donejakue bidean ere ibiliko da Nafarroa Oinez». Lodosa izena izanen du lehen guneak, eta ikastolan bertan izanen da. Elkarlanean dabil Lodosako Ibaialde ikastolarekin; izan ere, larri dabil Ibaialde. Horregatik, aurtengo ikastolen bestetako irabazien %20 ikastola horrexek eramanen ditu, laguntza moduan.

Lehen gune horrek Burlatan izanen denarekin batera familiarteko jarduerak izanen ditu batik bat: dantza ikuskizunak, bertsolariak, pailazoak eta puzgarriak. Gainera, Burlatan azpigune berezi bat prestatu dute: Scottish Highlands izena izanen du, eta eskoziar kultur eta kirol erakustaldiak izanen ditu. Uharteko eta Arreko guneak, berriz, kontzertuz beterik izanen dira, bereziki gazteei zuzendurikoak. Horietan, Askagintza eta Hegoak erakundeak ariko dira Gehiegikeriarik gabe ongi pasa daiteke mezua gazteei helarazten. Atarrabian, 5. gunean, dantza izanen da, bai ikusteko eta bai ikasteko, esaterako: jauziak, Afrikako dantzak eta Zuberoako dantzak.

Izan argi, dena garbi!

Ingurumenaren aldeko konpromisoa eta errespetua bereziki landu nahi dituzte aurten. Horrelaxe egin nahi dute, esaterako, berriz erabiltzeko diren edalontziekin, eta horiek erabiltzeko gomendatu dute. «50.000 edalontzi egonen dira, eta horiexen dirua Oinez Basora bideratuko dugu», azaldu dute antolatzaileek. Kutsadura gutxitu asmoz betiere, Nafarroa Oinez-era iristeko hainbat modu egongo dira. Aukera bat izango da oinez joatea ibai ertzetik Atarrabiaraino. Iruñerriko autobus zerbitzuak maiztasun handiagoarekin ibiliko dira, eta bizikletaz joatendirenendako aparkalekuak ere jarriko dituzte. Bestalde, ibilbide berezi bat egin dute gurpil aulkian dabiltzan edo bestelako ezintasunen bat duten pertsonendako.



Euskaraz munduz mundu

Munduz mundu leloak dioen moduan, munduan euskara irakasten eta oro har mundurat zabaltzen dabiltzan zenbait irakasleri eginen diete omenaldia Nafarroako ikastolen festan: Mexikon, Helsinkin eta Bartzelonan dabiltzan irakasleei, esate baterako. Bide berean, kulturartekotasunean euskarak baduela lekua erakutsi nahi dute.

Topagunea ere aintzat hartuko dute, urteotan guztiotan euskararen alde egindako lan osoarengatik. Jaiaren lekuko aldaketarekin batera izanen dira omenaldi horiek.

Datua

100

Jaian izango diren ekitaldiak. Bete-betea izango da igandeko egitaraua; 100 ekitaldi izango dira guztira. Badira beste hainbat datu deigarri ere: prest dira berriz erabil daitezkeen edalontzi horietatik 50.000, eta 20.000 txartel Oinez tonbolarako. 6.200 metroko ibilbidea izango da , bost gunetan banatuta. 110 mediku eta erizain ibiliko dira sei anbulantziatan.