Aterabide demokratikoaren aldeko manifestazioa egin da gaur arratsaldean Baionan, eta antolatzaileen arabera 4.000 lagun inguruk parte hartu dute. Horien artean zeuden, iragarri bezala, Aurore Martin eta Josu Esparza, euroagindu eskaera onartuta duten bi lagunak. Frantziako Poliziak inguruko karrikak itxi ditu, baina istilurik ez da izan. Martin Garitano Gipuzkoako ahaldun nagusia ere manifestazioan zen.
Antolatzaileek gatazkaren aterabide demokratikoa gauzatu dadin pausoak emateko eskatu diote Frantziako Gobernuari. Euskal Herriak bizi duen gatazkaren "konponbide politiko, demokratiko eta baketsu" baten alde engaiatzea exijitu diote Frantziako Gobernuari.
Azken egunetan zabalduz eta osatuz joan da babesa agertu duten eragileen zerrenda. Azkenak Aralar eta Europa Ekologia izan dira. Hogei eragilez gora ziren hitzorduarekin bat egin dutenak, eta sostengua abertzale eremutik haratagokoa izan da.
