«Aurrera egiteko» deia egingo du 2011ko Ibilaldiak 'Boga' leloarekin, Ondarroan

«Aurrera jo esan nahidugu Boga-rekin. Aurrera, indarrarekin: guztiok batera, Boga euskararen alde, Boga gure proiektua ezagutarazteko, Boga ikastola eredua indarberritzeko, Boga gure seme-alabengatik». Hitz horiekin aurkeztu zuten Ibilaldia 2011ko antolatzaileek, atzo, Bizkaiko ikastolen festarako hautatu duten leloa, «herri arrantzale bati ondo baino hobeto dagokiona». Logotiporik, berriz, ez du izango jaiak. «Horra nobedadea», azaldu zuten. «Ibilaldia 2011k ez dauka logotiporik. Edo ez dauka bakarra; ikuspegiaren arabera». Hamakaitxo bat irudi erabiliz idatziko dute Boga leloa, irudimentsu. Festa maiatzaren 29an izango da, Ondarroan. Antolatzen, hala ere, bi ikastetxe ari dira batera: Ondarroako Zubi Zahar eta Lekeitioko R.M. Azkue. Ikastola bietako arduradunek eta Ikastolen Elkarteko ordezkariek agerraldia egin zuten atzo.

1960ko hamarkadan bidea egiten hasitako ikastetxeak dira bi horiek. Bietan, 0-16 urte bitarteko ikasleak dituzte egun, eta hezkuntza kooperatiba gisara dihardute. Ibilaldiaren bitartez, «beharrezko dituzten baliabideak» lortzeko ahalegina egingo dute, baina harago ere egin nahi dute egun horrekin. «Ibilaldia lagun izango dugu hezkuntza eredua herriratzeko, eta eskualde honetako euskara lau haizeetara zabaltzeko».

Gizartearen sektore ahalik eta zabalenetara heltzeko ahalegin berezia egingo dute datozen hilabete hauetan. «Jende askorengana ailegatu nahi dugu», ohartarazi dute, eta logotipo bat baino gehiago erabiltzeko ideia xede horrekin lotu dute, hain justu. «Irekitasunaren eta malgutasunaren seinale da, eta ezaugarri horiek zabaltzea nahi dugu, ikastolaren izaerarekin lotuta baitaude».

Logotipoak jasotzeko deia

Asmo horrekin,dei zabala egin dute Boga leloarekin logotipoak jasotzeko. Arrakastatsua izaten ari da, gainera. «Asko dira euren ekarpena egin dutenak», azaldu dute. «Baina oraindik ekarpen asko eta asko edukitzea espero dugu».

Gaur, 19:00etan, Ondarroako Kafe Antzokian, jaia aurkeztuko dute herritar guztientzat.

Datua

33

Ibilaldiaren zenbatgarren aldia izango den. Datorren urtean, Ibilaldia 33. aldiz izango da. Uribe Kostako ikastolek antolatu zuten lehen jaia, Getxon, 1978. urtean. 1980. urtetik etenik gabe egin da urtero Bizkaiko ikastolen festa handia.