2013ko apirilekoa da erabakia. Kanboko Xalbador kolegioa (Lapurdi) eraberritzeko akordioa sinatu zuten Seaskak eta Gipuzkoako Foru Aldundiak. Aurreratuta zeuden ikastetxea berritzeko lanak ordurako, eta sei hilabeteren buruan inauguratu zuten, aldundiko ordezkariak han zirela.
600.000 euroko laguntza ematea legez kanpokoa zelakoan, auzitara jo zuen Carlos Urkijok, Espainiako Gobernuak EAEn duen ordezkariak. “Diputazioak dagozkion eskumenen esparrua gainditu du, Frantzian dagoen erakunde bati eragiten baitio”. Euskara laguntzea ez zen aski argudio Urkijorentzat; hori Jaurlaritzaren eskumena dela nabarmendu zuen.
EAEko Justizia Auzitegi Nagusiak bat egin du Urkijoren tesiarekin: “Ezin da ezarri inolako loturarik Frantziako herrialdean dagoen Xalbador kolegioari emandako laguntzaren eta diputazioaren jardun eremuaren artean”.
Diputazioaren laguntzaren aurka egin zuten PSE-EEk eta PPk. “Gipuzkoarren dirua” horretara bideratu izana salatu zuten. EAJk, aldiz, babestu egin zuen aldundia; gogorarazi zuen EAJk ere hartu izan dituela horrelako erabakiak, eta “babes osoa” zuela Bilduk horretan.
Epaileak ez du legezkotzat jo laguntza, eta dirua berreskuratzeko agindu dio.
