Hamarnaka auzokidek elkartasuna adierazi die urtarrilaren 8an Espainiako Audientzia Nazionalera deklaratzera joatekoak diren hamaika gasteiztarrei; iragan uztailean euskal preso eta iheslarien alde eginiko kalejira batean parte hartzeagatik deitu ditu Pablo Ruz epaileak. “Terrorismoari gorazarre” egiteagatik prozedura penala abiatu edo ez erabakiko du Ruzek. Auzokideak babesteko, autobusa antolatu du Plazara! mugimenduak urtarrilaren 8rako.
Iragan uztailean Gasteizko alde zaharreko jaietan egin zen aipaturiko kalejira, Zaharraz harro! egitarauaren baitan. Zitatuei edo datozen egunetan zitatuak izan daitezkeen lagunei elkartasuna adierazteaz gainera, auzokideek jasandako “erasoa” salatu dute; Iraia San Ildefonso eta Sergio Garcia mugimenduko bozeramaileen arabera, herritarren oinarrizko eskubideak urratu dira auto honen bidez, adibidez, adierazpen edota elkarretaratze eskubideak.
