Datorren urteko martxoaren 19an egingo dute galdeketa Lezon, Pasaian, Errenterian eta Oiartzunen (Gipuzkoa), eta egun horri begira giza katea antolatu du Demoarso plataformak azaroaren 6rako. Gaur, mobilizazioan parte hartzera deitzearekin batera, katean egingo dutenaren xehetasun batzuk iragarri dituzte.
Giza-katearen adar bakoitzetik hautetsontzia eta botopapera lekuko gisa aterako dira, eta "eskualdeko aniztasuna ordezkatzen duten kideen bitartez" bi lekukoak Errenteriako Zumardian elkartuko dira. "Herri honen geroa denon artean erabakiko dugu, edozein dela ere bakoitzaren pentsaera, jatorria, jarduera, sektorea... Horregatik, hemen batu garen tramu ezberdinetako lekuko eramaleok ere aniztasun horren isla garela aldarrikatu nahi dugu", erantsi dute.
12:15ean irtengo dira bi lekukoak, eta 13:00etan ekitaldi sinbolikoa egingo dute Errenterian.
Egitaraua
11:45: bi traineruk bozka ontzi bat eta bozka bat eramango dituzte San Pedroko Torreko plazara eta Donibaneko Santiago plazara.
12:00: giza katea eratuko da, eta aurki bozka ontzia zein bozka (lekukoak) bidea egiten hasiko dira Errenteriako Gamon zumardiraino.
13:00: Errenteriako Gamonen bozka sinbolikoa eta ekitadia. Segidan, Beira taldearen emanaldia, Demoarsorentzat egin duten abestian parte hartzen duten hainbat musikari ezagunekin.
15:30: beste musika talde bat.
17:00: DJ Bull.
Egunean zehar txarangak eta kale animazioa, taloak...
