Iragan astean Erriberan izandako uholdeek 3.000 eta 4.000 hektarea lursail kaltetu zituzten. Hala eman du jakitera Jose Javier Esparzak, Nafarroako Landa Garapen, Ingurumen eta Toki Administrazio kontseilariak. Esparza Buñuelen, Ribaforadan eta Valtierrak egon da, kaltetutako lurrak ikusten. Herri horietako alkateekin egon da bilduta, eta agindu die Ebroko Ur Koonfederazioko arduradunekin hitz egingo duela, uholdeak saihesteko egin daitezkeen hobekuntza lanak aztertzeko.
Gaur elurra egin du batez ere. Nafarroan, batik bat iparraldean, egin du, Gobernuak elurra kentzeko 77 makina prest ditu atzo gauetik. Izaban NA-137 errepidea itxita dago, eta Iratiko eta Zaraitzuko NA-2012 eta NA-2011 ere itxita daude. Gainera, gobernuak esan du herrialde osoan izotza egin dezakeela eta Pirinioetatik gertu bereziki gogorrak izan daitezkeela. Alerta laranja ezarria du iparraldean eta erdialdean.
Araban, Bizkaian eta Gipuzkoan ere mendian elurra ari du, eta Jaurlaritzak alerta horia ezarri du elur, izozte eta olatuengatik. Gaur goizean elurraren maila 400 eta 600 metro inguruan egongo dela iragarri zuen atzo, eta 800 eta 1.000 metro ingurura igoko dela egunak aurrera egin ahala.
Araban Herrera, Orduña eta Opakua itxita daude ibilgailu denentzat. Azazetan eta Bernedon autoek kateak behar dituzte, eta kamioientzat itxita daude. Kurtzetan, Barrerillan, Salinasen, Gatzagan eta Zaldiaranen kateak beharrezkoak dira ibilgailu guztientzat. Altuben erne gidatzeko eskatu dute.
Bizkaian Urkiolan kateak behar dira. Gipuzkoan Elosuan behar dira, eta Etxegaraten adi gidatzea galdegin dute.
Kostaldean 4-5 metro inguruko olatuak dabiltza.
Urnietan hamahiru ibilgailuk eta moto batek elkar jo dute A-15ean goizeko zortziak aldera, eta lau lagun zauritu dira, Jaurlaritzako Segurtasun Sailak esan duenez.
Bihar tenperaturak apur bat igoko dira, eta goizean goiz euria egingo du.
