Azkeneko entzierroa, azkarra eta adarkadarik gabea

Azkarra izan da Iruñeko sanferminetako azkeneko entzierroa -Nuñez del Cuvillo ganadutegiko zezenak-, 2.18 iraun duelako, eta garbia ere izan da. Ez da adarkadarik gertatu, eta lau lagun baizik ez dituzte eraman erietxera, Gurutze Gorriak esan duenez: bi korrikalari orkatila bihurrituta, bat belauna bihurrituta, eta beste bat buruan kolpearekin -50 urteko eskoziar gizonezko bat, eta aztertzen ari dira; Mercaderesen hartu du min-.

Udaletxe plazaren hasiera arte zezenak eta joaldunak batera joan dira, eta han aurrea hartu du zezen batek. Mercaderes bihurgunean korrikalari bat -entzierroen ezagutzarik ez duena, segurdanik-, geldirik geratu da, eta zezen batek aurrez aurre jo du. Beste zezen batek, berriz, beste lagun bat bota du.

Estafetan -Santo Domingon bezala-, oso lasterketa ederrak ikusi dira. Izan ere, baliteke gaur izatea jende gutxien, festetako azkeneko egunean. Zezenaren muturrean oso ondo korritzen ari zen lagun batek karrera luzeegia egin du eta azkenerako zezenak adarrekin baztertu egin du.

Zezen-plaza sarreran, kailejoi bukaeran, zezen bat lurrera erori da, hamar bat segundoz etzanda izan da, baina ez da arazorik sortu.

Entzierroa bukatu eta segituan hasi dira udal langileak hesiak kentzen. 9:00etarako erretiratu dituzte ibilbideko denak, bukatu baitira aurtengo entzierroak.

Entzierroak

Uztailak 7. Ganadutegia: Alcurrucen. 2.30eko iraupena. Adarkadarik ez. Zauritu larririk ez.

Uztailak 8. Cebada Gago. 2.35. Adar ziztada bat -jaso zuen sendagiria-. Zauritu larririk ez.

Uztailak 9. El Ventorrillo. 2.20. Adarkadarik ez. Zauritu larririk ez.

Uztailak 10. Jandilla. 4.30. Lau adarkada. Hildako bat; lepoan jaso zuen adarkada.

Uztailak 11. Dolores Aguirre. 2.52. Adarkadarik ez. Zauritu larririk ez.

Uztailak 12. Miura. 5.00. Bost lagun adarkadatuak. Zauritu larri bat, eta bat oso larri -hobera egin du-.

Uztailak 13. Fuente Ymbro. 2.22. Adarkadarik ez. Zauritu larririk ez.

Uztailak 14 (gaur). Nuñez del Cuvillo. 2.18. Adarkadarik ez. Zauritu larririk ez.