Eusko Jaurlaritzako Hezkuntza Sailak jakinarazi duenez, COVID-19agatik aurrez aurreko eskolak etetea erabaki dute Azkoitiko Bizilore eskola aktiboan (Gipuzkoa). Jaurlaritzak ez du zehaztu noiz itzuliko diren eskolara hango 38 ikasleak, ezta zenbat positibo izan diren ere.
Gaur-gaurkoz, erabat itxita dagoen eskola bakarra da Bizilore, baina ikasgela batzuk itxiak dituzte beste zenbait ikastetxek. Orotara, 237 talde daude konfinatuta Hego Euskal Herriko 149 ikastetxetan; hots, ikasgelen %1,13 itxita daude. Nafarroako Gobernuko Hezkuntza Departamentuak beste datu bat ere eman du: azken orduetan beste 221 ikasle konfinatu behar izan dituzte, eta 1.913 ikasle daude egoera horretan; hau da, ikasle guztien %3,1.
