Iñaki Azkuna "pozik" azaldu da 2012. urteko munduko alkate onenaren saria emango diotela jakin ostean, eta gaineratu du "bilbotar guztientzako saria" dela. Radio Euskadin eginiko adierazpenetan, Bilboko alkateak esan du "zortea" izan duela saria eskuratuta.
Azkunak azaldu du "poza" ematen diola "bat-batean" sari hori jasotzeak, oraindik minbizia sendatzeko tratamenduarekin jarraitzen duen uneotan.
Bilbo gainbeheran zegoen industria hiri izatetik turismoarentzat erakargarri izatera eraman du Azkunak, saria eman dion City Mayors Fundazioaren esanetan. 900 alkate baino gehiagoren artean hautatu dute Bilbokoa.
