Baionan formakuntza bat lortu zuen, lagunen bidez, eta gauero itzuli behar zuen presondegira. Formakuntza bukatzera zihoala, lanik atzeman ezean zuen estatusa kenduko ziotela erran zioten. Egoera horren ondorioz bere buruaz beste egitea deliberatu zuela jakinarazi dute Mathieu Oudin abokatuak eta Gabi Mouesca Nazioarteko Espetxeetako Behatokiko kideak.
Legea urratzea leporatzen diote Baionako espetxeko zuzendariari. Izan ere, Olivier M. "espetxe zentraletik" atera zen lanaren baldintzapean. Baionako espetxean auziperatu gabe edo kondena laburrak dituzten presoak daude. Espetxe aldaketak, beraz, gogortu zituen Olivier M.-ri ezarritako bizi-baldintzak. Espetxera sartu eta ateratzen zen bakoitean biluztu arazten zuten. Karrikan balia zitzakeen Internet eta telefonoa, espetxean ez. Abokatuak egoera salatu zuen, idatziz askastasun epaileari, ministeriora eta espetxeko zuzendariari. Ez zuen erantzunik jaso.
OIPk salatu du espetxean beren buruaz beste egiten duten pertsonen kopurua karrikakoa baino zazpi aldiz handiagoa dela. Urtean ehun preso inguruk egiten dute bere buruaz beste Frantziako espetxeetan.
