EIPK Euskal Iheslari Politikoen Kolektiboak ohar baten bidez adierazi du martxoaren 22an zehaztutako bide orria jarraitzen ari dela, "hamarnaka" baitira erbestea utzi eta sorterrietara itzultzen hasi diren iheslariak. Kolektiboak eskerrak eman dizkie "besoak zabalik" hartu dituzten herritarrei, baita konponbidearen alde diharduten eragile eta alderdiei ere.
Hala ere, ohartarazi du oraindik bidea dagoela egiteko. "Euskal Herrian luzaz pairatutako gatazka politikoak eta haren ondorioak konponduak izateko akordio zabalak lortzeko momentua da".
Kolektiboaren iritziz, garaia da "neurri errepresibo guztiak" bertan behera gelditzeko, iheslari politikoen kontrako euroagindu eta atxiloketak gelditzeko, baita "torturapean egindako adierazpenetan oinarritutako prozedura judizialak" bertan behera uzteko ere.
Horrekin batera, iheslarien bizi duintasuna eta oinarrizko eskubideak ziurtatzeko neurriak eskatu ditu EIPK-k; tartean, gaixo larrien egoerari irtenbidea ematea. "Finean, salbuespen neurriak gelditu, bizi duintasuna bermatu eta egia eraiki. Erbestearen arrazoiak eta ondorioak konpondu".
Ipar Euskal Herriko 23 eragilek deitu dute manifestaziora, Giza eskubideak, Konponbidea eta Bakea lelopean. 61 auzapez, bost herri elkargo buru, 205 herri hautetsi eta bost parlamentariren babesa lortu du; Jean Ziegler NBEko Giza Eskubideen batzordeko lehendakariordeak ere bat egin du.
