Ibon Iparragirre Ondarroako presoa apirilean urrundu zuten Basauriko kartzelatik Navalcarnerokora (Espainia). Etxerat euskal presoen senideen elkarteak baieztatu duenez, bakartuta daukate presoa.
Martxoan berriro kartzelan sartu zutenetik, haren osasun larriagatik eta Basaurin jasotzen ari zen tratuarengatik arduratuta agertu ziren senideak apirilean. Espetxezainek jo egin zutela kontatu zien presoak senideei. Astebete lehenago, preso arrunt batek jo zuen.
Ez hori bakarrik: epilepsia krisiak saihesteko beharrezko dituen botikak hartu ezinik zegoela esan zien hurkoei, espetxezainek ez zizkiotelako ematen sendagileek agindutako botikak.
