Barakaldoko (Bizkaia) PSE-EEk jakinarazi du azkenean hautsi egin duela EAJrekin 2015ean izenpetu zuen udal akordioa. Alkateari leporatu dio "behin eta berriz" urratzea "bertan ageri diren printzipioak".
Ana Belen Quijada bozeramaile sozialistak, astearteko prentsaurrekoan, adierazi du Barakaldoko Udalean departamentuak zuzentzen zituzten hiru zinegotziek dimisioa aurkeztu dutela.
Sozialistek azaldu dute denbora horretan guztian "elkar ulertzeko zailtasunak" egon direla, baina azkenaldian alkateak hartutako erabakiek "marra gorriak" igaro dituztela, "arriskuan jarri baitituzte kalitatezko zerbitzu publikoak eta udalerriko langileen lan baldintzak".
Quijadak gehitu du azken hilabeteetan hainbat mobilizazio ikusi direla udalbatzarretan. "Azken sei bileretatik batean ere ez dira falta izan kartelak eta udal zerbitzuren bateko langileen protestak".
