Joan den igandean 50 urteko emakume bat bortxatu zuten Lutxanako tuneletan, Barakaldon (Bizkaia). Argitan emakumeentzako aholkularitza etxeak eman du gertatuaren berri. Ertzaintzak ikerketa ireki du gertaerak aztertzeko, baina ez du gaiaren gaineko berri zehatzagorik eman.
Argitan taldeak gogora ekarri du joan den ekainean ere gertatu zirela bortxaketa saiakera gehiago. Haietako bat Renferen tunelean gertatu zen. Gertaerei buruz oharrak egin arren, udalak ez duela neurririk hartu salatu du Argitan-ek.
Lutxanako tunelak, berriz, Barakaldoko «puntu beltza» direla ohartarazi du, eta sarritan ohartarazi duela horretaz. Barakaldoko Udalari oroitarazi dio emakumezkoentzako arriskutsuak diren lekuen zerrenda egina dagoela. Udal Gobernuari eskaera ere egin zion taldeak, emakumeen aurkako sexu erasoak ez gertatzeko neurriak har ziztan leku horietan. «Baina udalak ez die kasurik egiten ez herritarren arazoei, ez emakumeen arazoei».
Heldu den azaroaren 24an, «bortxakeria sexistaren» aurkako protestan parte hartzera deitu du. Barakaldotik irtengo da martxa bat, Bide Onera plazatik, 11:30ean.
