Barcinak ere Konstituzioan aldaketak proposatu ditu

PSOEk eta PPk Estatuaren defizitaren sabaiari muga jartzen dion araua Espainiako Konstituzioaren barruan sartzeko lortu duten akordioaren alde mintzatu zen atzo Nafarroako foru gobernuko lehendakari Yolanda Barcina, eta aldaketa hori Konstituzioan berehala sartu behar dela defenditu zuen, erreferendumak-eta egin gabe, «presa handia du eta». «Presarik» ez den unean Konstituzioa erreformatzeko aukera ere egongo dela uste du Barcinak, eta orduan UPNk Konstituzioan aldaketak egitea defendituko du, hain zuzen ere EAE eta Nafarroa erkidego batean biltzeko atea irekitzen duen Konstituzioaren laugarren xedapen iragankorra ezabatzeko eskatuko du.