Yolanda Barcinak izendatu ditu jada Nafarroako Gobernuko kontseilari berriak, atzo Alvaro Miranda Nafarroako lehendakariorde eta Ekonomia eta Ogasun kontseilariak borondatezko dimisioa aurkeztu ostean.
Bost kide berri sartuko dira gobernu taldean: Lourdes Goikoetxea Ekonomia eta Ogasuneko kontseilari —Industria eta Enplegu kontseilaria ere bada— eta presidenteorde izendatu du; Jose Javier Esparza Landa, Garapen eta tokiko administrazio kontseilari; Javier Morras Lehendakaritza, Justizia eta Barne kontseilari; Jesus Rejenaute Gizarte Politikakoa eta Luis Zarraluki Sustapen eta Etxebizitzakoa.
Juan Luis Sanchez de Muniain izango da bigarren presidenteorde eta bozeramailea.
Mirandak dimisioa ematearekin bat, Nafarroako Gobernuaren krisia sakondu egin da. Joan den astean PSNko hiru kontseilariek kargua utzi ostean, orain UPNko batek utziko baitu gobernuan garrantzi handia duen aulkia —Foru Gobernuan hamasei urte zeramatzan—.
Gobernukide sozialistei aurretik ezer esan gabe Ekonomia eta Ogasun kontseilariak 132 milioi euroren murrizketak iragarri izanak bultzatu zuen UPNren eta PSNren arteko gobernu itunaren haustura. Kargua utzita, Roberto Jimenezek zuzentzen duen alderdiak berriro Barcinari babesa emango dion itxaropena du Mirandak.
