BBC, 'Egunkaria auzia'-z galdezka

BBC Erresuma Batuko irrati-telebista kate publikoa Euskal Herriko egoera politikoaz erreportajea egiten ari da egunotan, hona etorrita, eta gaur goizean Andoainen izan da, BERRIAren egoitzan, Egunkaria auzia-ri buruz galdezka. Sarah Rainsford kazetariak telebistarako ordu erdi inguruko elkarrizketa egin dio Martxelo Otamendi Egunkaria-ko auzipetu eta BERRIAko zuzendariari. BBCk Madrilen daukan berriemailea da Rainsford. Oraindik ez dakite noiz emango duten erreportajea.

Albisteen arloan munduko hedabiderik handiena da BBC British Broadcasting Corporation, eta prestigio handia du. 1922an sortu zuten irratia eta 1936an telebista, eta erakunde ororekiko duen independentzia da haren ardatz nagusietakoa.