Bederatzi lagun atzeman dituzte Gipuzkoan, dirua zuritu dutelakoan

Espainiako Poliziak bederatzi lagun atxilotu ditu Gipuzkoan, atzerrira ustez dirua zuritzeko 32 milioi euro baino gehiago bidali dituztelako. Poliziak dioenez, Irungo bi lokutoriotan eta Donostiako hirutan egin dituzte diru mugimenduak atxilotutakoek.

Besteak beste, Kolonbiara bost milioi euro igorri dituzte, betiere ikerketako iturriek diotenez, Nikaraguara 4.300.000 euro eta Hondurasera 900.000.

Operazioak pertsona desberdinen izenean egiten zituzten, izen-abizen faltsuak emanda. Esate baterako, Gipuzkoan Nikaraguako 553 lagun daude erroldatuta, eta Poliziak dio izen desberdinekin mila lagunek baino gehiagok bidali dutela dirua Nikaraguara.

Irunen lau etxebizitza miatu dituzte eta hiru Donostian.